نئی آئی سی سی ٹیسٹ رینکنگ،پاکستان نے ایک تیر سے دو شکار کرلیے

 دبئی(مانیٹرنگ ڈیسک ) دبئی ٹیسٹ جیت کر پاکستان نے ایک تیر سے دو شکار کیے، بھارت کو چھٹے نمبر پر دھکیل کر پانچویں پوزیشن پر قبضہ جمالیا اور کئی کھلاڑیوں نے اپنی انفرادی رینکنگ بھی بہتر کر لی ہے ۔
تفصیلات کے مطابق دبئی ٹیسٹ میں آسٹریلیا کو 221 رنز سے ہراکر پاکستان ٹیم رینکنگ میں پانچویں نمبرپر آگیا۔میچ کی دونوں اننگز میں سنچریاں بنانے والے یونس خان ایک بار پھر ٹاپ ٹین میں واپس آگئے،چار درجے ترقی حاصل کرنے کے بعد اب وہ ساتویں نمبر پر پہنچ گئے ہیں،کپتان مصباح الحق 10ویں سے 11ویں پوزیشن پر چلے گئے۔
اسد شفیق 21ویں ،اظہر علی 27ویں اور دبئی ٹیسٹ کی پہلی اننگز میں صرف 80 گیندوں پر سنچری داغنے والے سرفراز احمد 38ویں نمبر پر پہنچ گئے۔اوپننگ بیٹسمین احمد شہزاد نے بھی 14 درجے ترقی پاکر 52 واں نمبر حاصل کرلیا۔سری لنکا کے کمار سنگا کارا پہلی اور جنوبی افریقا کے اے بی ڈیلولیئرز کی دوسری پوزیشن ہے۔باﺅلنگ میں ڈیل اسٹین بدستور پہلے نمبر پر ہیں ،کینگرو پیسر رائن ہیرس دوسرے اورسری لنکن سپنر رنگنا ہیراتھ تیسرے نمبر پر ہیں۔دبئی ٹیسٹ کی دوسری اننگز کے ہیرو ذوالفقار بابر 46 درجے ترقی کے بعد 51 ویںاور ڈبیو ٹیسٹ میں 7 وکٹیں حاصل کرنے والے یاسر شاہ 62 ویں نمبر پر ہیں۔پابندی کا شکار جادوگر سپنر سعید اجمل اب بھی ٹاپ ٹین میں موجود واحد پاکستانی باﺅلر ہیں۔